मालीमा सैनिक “कू”: राष्ट्रपति र प्रधानमन्त्रीलाई बन्दी बनाइयो


लेखापढी      ४ भाद्र २०७७, बिहीबार ००:५६

मालीमा सैनिक “कू”:  राष्ट्रपति र प्रधानमन्त्रीलाई बन्दी बनाइयो

एजेन्सी- पश्चिम अफ्रिकी मुलुक मालीमा सरकारी सेनाबाटै विद्रोह भएको छ ।सरकारसँग असन्तुष्ट सैनिकहरुको एक समुहले राष्ट्रपति इब्राहिम बुबाकर केईटा र प्रधानमन्त्री बुबो सिस्सेलाई बन्दी बनाएका छन् । सरकारी सेनाका कर्णेल मालिक डियाको नेतृत्वमा विद्रोह गरिएको हो ।

बागी सैनिकहरुले राजधानी बामाकोदेखि ११ किलोमिटरको दुरीमा रहेको एक सैनिक शिविरमा उनीहरुलाई राखेका छन् ।

राष्ट्रप्रमुख सहित अन्य शिर्ष अधिकारीहरुलाई नियन्त्रणमा लिनुअघि उनीहरुले कटी सैनिक अखडा आफ्नो कब्जामा लिएका थिए ।

उनीहरुको मागबारे केही खुलाईएको छैन भने बागी सैनिकहरुसँग कति सेनाको साथ रहेको छ भन्नेबारे पनि अन्योल छ । मालीमा सेना र सरकारबिच लामो समयदेखि दुरी बढीरहेको थियो ।

सैनिकहरुलाई तलब र अन्य सेवा सुविधा र देशमा बढ्दो जिहादी समुहसँग राष्ट्रपतिको सम्बन्धलाई लिएर लगातार टिकाटिप्प्णीहरु भईरहेका थिए ।  यसैबिच अफ्रिकी राष्ट्रहरुको समुह ‘इकोवास’ले यो घटनालाई सैनिकबाटै गरिएको ‘कु’ को प्रयास भनेको छ । नियन्त्रणमा लिइएका राष्ट्रपति लगायत सम्पूर्णलाई तत्काल रिहा गर्नुपर्ने इकोवासको माग छ ।

परिस्थती साम्य नभएसम्म १५ सदस्यीय इकोवासका हरेक देशले मालीसँगको सिमा बन्द गरेका छन् भने आर्थिक कारेबार पनि रोक्ने जनाएका छन् ।